أزاى أتفوق دراسيا ..وأحصل على لقب " عبقرينو المنتدى "

السلام عليكم ورحمه الله

زملائى البيوفيزيائيين وأعضاء المنتدى الكرام
كل عام وانتم بخير بمناسبة بداية العام الدراسى الجديد

اول المشاريع التنفيذيه ان شاء الله فى منتدى تطويرقدرات البيوفيزيائيين هيكون بيخدم اول اهداف المنتدى نفسه
وهوه ازاى نقدر نتخرج من الجامعه واحنا محققين اعلى التقديرات ومتفوقين
لان ده بجد اول خطوات بناء المستقبل وكمان اول حاجه بيتسأل عنها لما تقدم فى وظيفه بعد التخرج

طيب هانعمل ايه بالضبط يعنى ؟؟؟

هيكون فى نشاطين اساسيين هنعملهم فى الموضوع ده

الاول : هى اشتراك جميع الاعضاء بجدية فى وضع اضافات مستمره - من خبراتهم الشخصية او من اى مصدر اخر زى كتاب اونت او غيره - عن اساليب المذاكره الصحيحة والمناسبة لكل ماده من مواد البيوفيزياء والطرق المثاليه لتحقيق الاهداف والنصائح التى تخدم تنظييم الوقت وتقوية الذاكرة اثناء الدراسه وانواع الطعام المفيده فى تلك الفترة وساعات النوم المثاليه عددا ووقتا وساعات المذاكرة المثاليه ايضا وهكذا
وبالتالى لو حد حب يسأل عن حاجه تخص الموضوع ده يعنى بيواجهه اى مشكله من اى نوع بخصوص الدراسه ومذاكرة مواد البيوفيزياء المختلفة ميترددش انه يقول ويسأل وان شاء الله يجد الاجابة التى يأملها

غير ان كمان فى ميزه ربنا يقدرنى واحاول اقدمها لكم كما يجب ... وهى ان لو اى حد مش عارف ينظم وقته بين الكليه و المذاكرة والترفيه اومش عارف ينظم المذاكره تبعا لجدول الامتحانات مجرد انه يبعتلنا جدوله على الرسائل الخاصة فى المنتدى وده طبعا عشان نضمن خصوصية جدوله ومواعيده ...

و ان شاء الله فى اقرب وقت نقدمله مجموعه من الجداول المقترحة لتنظيم وقته معده ومصممه له شخصيا .... بس لازم يعرف ان هيكون اساس الجدول ده واكتر ساعاته مخصصه للمذاكره ... عشان احنا بنهدف للتفوق مع مراعاه الوقت المخصص للترفيه والراحه طبعا والقيام بالانشطه الاخرى .

لكن لو الجدول ده خاص بالدفعه كلها يحطه فى الموضوع ويطلب اقتراحات لتنظيم الوقت ؟ويشترك كل الاعضاء فى اضافات تجيب عن هذا الطلب ان شاء الله

وبعدين الاعضاء اللى استفادوا من الموضوع والاضافات يبدأوا يوضحوا كيفية الاستفادة دى وينصحوا باقى الاعضاء من خلال تجربتهم



طيب عرفنا النشاط الاول مع انه لسه كلام واراء وتبادل معلومات يعنى شئ معنوى اكثر .. طيب هنضمن منين ان الكلام ده فعلا الاعضاء تنفذه وتذاكر وتتفوق زى ما المنتدى بيخطط لكده
انتوا مش قولتوا ان منتدى تطوير قدرات البيوفيزيائيين هايعمل على المستوى المادى اكتر ؟؟؟؟!!!!!السؤال ده ممكن يخطر ببال اى حد فعلا من هنا جاء النشاط الثانى للموضوع

النشاط الثانى : هو عبارة عن مسابقه بين الاعضاء والمسابقه دى اسمها " عبقرينو المنتدى "
وهيه ان شاء تكون مسابقه لذيذه ودمها خفيف بين اجرأ اعضاء المنتدى من البيوفيزيائيين على اختلاف مراحلهم

و ليه اجرأ الاعضاء فقط ....؟؟؟!!

لانهم هما الوحيدين اللى هتكون عندهم الجرأة انهم يكتبوا كل الدرجات اللى هيحصلوا عليها خلال السنه الدراسية فى الموضوع ده وأقصد ب " كل الدرجات " كل الدرجات فعلا الوحش قبل الحلو وان شاء الله مايكونش في وحش ابدا
واعلى واحد فى الدرجات هياخد لقب عبقرينو المنتدى ويفضل باقى المنتافسيين يندهولوا بالاسم ده لغاية ما حد تانى ياخد اللقب منه
ويفضل اللقب يتنقل بين الاعضاء لغاية ما ياخذه احدهم فى نهايه الترم وقتها تكون ليه هديه ويستمر اللقب معاه فى باقى المنتديات والمواضيع الاخرى طول اجازة الترم .

ولو احد المتنافسيين مش عايز يذاكر او درجاته بدأت تقل نشجعه و نشوف مشكلته فين ونحلها ولو ما استجبش نحرجه كده بالكلام على خفيف بخفة دم وروح طيبة عشان يذاكر وناقوم عليه ضميره
واللى درجاته بدأت تعلى نشجه اكثر ونحمسه للمذاكرة
طيب ما هوه مواعيد الامتحانات وقيمة الدرجات مش هاتكون واحدة عند كل المتنافسين وخاصة انهم ممكن يكونوا فى مراحل مختلفة ...ايه الحل بقى ساعتها ...؟؟؟!!!الحل بسييط جدا
بالنسبة لمواعيد الامتحانات : اللى يمتحن وتطلع نتيجته يكتبها لو كان عالى ياخد اللقب ويفضل اللقب معاه لحد ما باقى المتنافسين يمتحنوا وتطلع نتيجتهم لو هما اعلى منه ياخده منه اللقب ولو لا يحتفظ هو باللقب

بالنسبة لقيمة الدرجة : كل الدرجات هاتتكتب على هيئة نسبة مئوية يعنى رقم %

طيب ممكن توضحوا ازاى النشاط الثانى بيجعل النشاط الاول اكثر ماديه وبيحقق الهدف من الموضوع ده اصلا ان البيوفيزيائيين يتخرجوا متفوقين ؟؟


الاجابه : ان المسابقات بشكل عام بتنمى روح التحدى عند الافراد وبتخليهم يستخدموا كل امكانيتهم و قدراتهم للفوز فى المسابقة وهو الحصول على اللقب بالوصول لاعلى الدرجات وده التفوق اللى بيسعى ليه المنتدى
وعشان يحققوا ده بيحتاوجوا كل المساعدات والنصائح والاساليب المثالية للفوز وده اللى المنتدى بيقدموا من خلال النشاط الاول للموضوع

وفى النهاية المنتدى يحقق اولى اهدافه وكمان الاعضاء يحققوا النجاح اللى بيتمنوه ويبدأوا الدخول لسوق العمل بروح متفائله و اختيارات واسعه و ترحيب من قبل اصحاب محال العمل ان شاء الله

ملحوظه : متاح لكل الاعضاء المشاركه فى النشاط الاول
ولكن بالنسبة للمسابقه اللى عايز يشترك يرسل لى اسمه على الرسائل الخاصة بالمنتدى فى اقرب وقت
عشان انزل جدول بالاسماء وخانات خاصة بلقب المسابقة
والاسماء دى هتكون ملزمه امامى وامام باقى المتنافسيين انهم ينزلوا درجاتهم صحيحة ( كما يتوقع المنتدى من مصداقية اعضائه ) فى مواعيدها خلال الترم ان شاء الله .

ولو حد شاف الموضوع ده متاخر اى بعد تنزيل الجدول وعايز يشترك
يبعتلى اسمه وانا اضيفه و بس مش هايكون له الحق فى اخد اللقب من عضو بأثر راجعى يعنى على درجات عاليه جابها قبل ما يشترك فى المسابقة .

عفوا انى طولت عليكم

وياريت يا جماعة ما تخفوش من الاشتراك فى المسابقه دى حاجه ودية بينا واعتقد انها تجربه جديده وهاتبقى ممتعه وناجحه ولن تنسى ان شاء الله

ونبدأ بقى فعلا .... نخلى مستقبلنا افضل